പ്രധാനമന്ത്രി നരേന്ദ്ര മോദി നേതൃത്വം നൽകുന്ന മൂന്നാം എൻഡിഎ സർക്കാരിന്റെ ആദ്യ ബജറ്റ് ഇന്ന് അവതരിപ്പിക്കും. രാവിലെ 11 മണിക്ക് ധനമന്ത്രി നിർമലാ സീതാരാമൻ പാർലമെന്റിൽ ബജറ്റ് അവതരണം നടത്തും. ഒറ്റയ്ക്ക് ഭൂരിപക്ഷം ഇല്ലാത്തതിനാൽ കഴിഞ്ഞ രണ്ട് തവണത്തെ സർക്കാരുകളെ അപേക്ഷിച്ച് ഇത്തവണ ജനപ്രിയ പ്രഖ്യാപനങ്ങൾ ഉണ്ടാകുമെന്നാണ് പ്രതീക്ഷിക്കുന്നത്.

പണപ്പെരുപ്പം പിടിച്ചുനിർത്തുന്നതിലൂടെ അവശ്യവസ്തുക്കൾക്കും നിത്യോപയോഗ സാധനങ്ങൾക്കും വില കുറയ്ക്കാനുള്ള പദ്ധതികൾ ബജറ്റിൽ പ്രതീക്ഷിക്കുന്നു.

ജി 20 നേതാക്കളിൽ നിന്നും ശതകോടീശ്വരന്മാർക്ക് മേൽ അധിക നികുതിയേർപ്പെടുത്തണമെന്ന ആവശ്യം ഉയർന്നുവന്നിരുന്നു. സാമ്പത്തിക അസമത്വം കുറയ്ക്കുന്നതിന്റെ ഭാഗമായി ഇത്തരത്തിൽ ഒരു അധിക നികുതി ഘടന ഇന്ത്യയിൽ കൊണ്ടുവരുമോ എന്ന് ജനങ്ങൾ ഉറ്റുനോക്കുന്നുണ്ട്.

ബജറ്റ് പ്രതീക്ഷകൾ

വ്യക്തികൾക്ക്

• ആദായനികുതി ഇളവിനുള്ള പരിധി വർദ്ധനവ്
• ആദായനികുതി സ്ലാബ് ഉയർത്തൽ
• മുതിർന്ന പൗരന്മാർക്കുള്ള നികുതി അടിസ്ഥാന ഇളവ് പരിധി 7 ലക്ഷമായി ഉയർത്തൽ
• പുതിയ നികുതി വ്യവസ്ഥയിൽ കൂടുതൽ നികുതി ഇളവുകൾ
• കൂടുതൽ തൊഴിലവസരങ്ങൾ

ബാങ്കിംഗ്

• ഭവനവായ്പ നികുതിയിളവ് പരിധി ഉയർത്തൽ
• നിക്ഷേപങ്ങക്ക് നികുതി ഇളവ്
• ഉന്നത വിദ്യാഭ്യാസ വായ്പകളുടെ പലിശ നിരക്കുകളിലെ ഇളവ്

വ്യവസായം

• എംഎസ്എംഇക്ക് കൂടുതൽ ആനുകൂല്യം
• ആർട്ടിഫിഷ്യൽ ഇന്റലിജൻസ്, സൈബർ സുരക്ഷ വിഹിതം വർധിപ്പിക്കൽ
• മേക്ക് ഇൻ ഇന്ത്യ പദ്ധതിക്ക് പ്രോത്സാഹനം
• ജിഎസ്ടി നിരക്കുകളിൽ കുറവ്

കേരളത്തിന്റെ പ്രതീക്ഷ

• വിഴിഞ്ഞം പദ്ധതിക്ക് 5,000 കോടി
• 24,000 കോടിയുടെ പ്രത്യേക സാമ്പത്തിക പാക്കേജ്
• സിൽവർലൈൻ, എയിംസ് തുടങ്ങിയവക്ക് അനുമതി