ഇന്ത്യൻ റോഡുകൾ സുരക്ഷിതമാക്കുന്നതിനുള്ള ചുവടുവയ്പ്

കൊച്ചി: ഇന്ത്യയിലെ മുൻനിര നേത്ര പരിചരണ ബ്രാൻഡായ ടൈറ്റൻ ഐ+ ഇന്ത്യൻ റോഡുകൾ സുരക്ഷിതമാക്കുന്നതിൻറെ ഭാഗമായി 'ദ ഐ ടെസ്റ്റ് മെനു' അവതരിപ്പിച്ചു. റോഡിൽ ജീവൻ അപകടത്തിലാകുന്നതിന് കാരണമാകുന്ന ഡ്രൈവർമാർക്കിടയിലെ കാഴ്ച സംബദ്ധിച്ച പ്രശ്നങ്ങളെ അഭിസംബോധന ചെയ്യുന്നതിനായുള്ള ശ്രമമാണ് ലോക കാഴ്ച ദിനത്തിൽ ടൈറ്റൻ ഐ+ ആരംഭിച്ചിരിക്കുന്നത്.

കാഴ്ച വൈകല്യത്തെക്കുറിച്ചും കണ്ണിൻറെ ആരോഗ്യത്തിൻറെ പ്രാധാന്യത്തെക്കുറിച്ചും അവബോധം സൃഷ്ടിക്കുന്നതിനാണ് ആഗോളതലത്തിൽ ലോക കാഴ്ച ദിനം ആചരിക്കുന്നത്. നേത്ര സംരക്ഷണത്തിനായി വരാൻ ഡ്രൈവർമാർ പലപ്പോഴും താൽപ്പര്യപ്പെടാത്തതിനാൽ, അവരിലേക്ക് നേത്ര പരിചരണം എത്തിക്കുവാനാണ് ടൈറ്റൻ ഐ+ ശ്രമിക്കുന്നത്.

ഈ സംരംഭത്തിൻറെ ഭാഗമായി, ട്രക്ക് ഡ്രൈവർമാർ ഭക്ഷണത്തിനും വിശ്രമത്തിനുമായി നിർത്തുന്ന ധാബ പോലുള്ള സ്ഥലങ്ങളിൽ ടൈറ്റൻ ഐ+ നേത്രപരിശോധനാ ക്യാമ്പുകൾ സംഘടിപ്പിച്ചു. വിശ്രമ സമയം നേത്ര സംരക്ഷണത്തിനുള്ള ഒരു അവസരം കൂടിയാക്കി മാറ്റി. പരമ്പരാഗത ഭക്ഷണ മെനുവിന് പകരം കാഴ്ച പ്രശ്നങ്ങൾക്കായി ഡ്രൈവർമാരെ പരിശോധിക്കുന്നതിനായുള്ള ലളിതമായ ഒരു 'ഐ ടെസ്റ്റ് മെനു' അവതരിപ്പിച്ചു. ചുവരുകളിൽ പ്രദർശിപ്പിച്ച ഈ മെനു ഒരു നേത്ര പരിശോധനയുടെ മാതൃകയെ അനുകരിച്ചു. ഭക്ഷണ ഓർഡർ നൽകുന്നതിന്, ഡ്രൈവർമാർ ഈ 'ഐ ടെസ്റ്റ് മെനു' ഉപയോഗിക്കണം. അതിലൂടെ അവരുടെ കാഴ്ച പ്രശ്നങ്ങൾ ഉടനടി വ്യക്തമായി.

ധാബകളിൽ നടത്തിയ നേത്രപരിശോധനാ ക്യാമ്പുകളിൽ വിദഗ്ദ്ധരായ ഒപ്റ്റോമെട്രിസ്റ്റുകളാണ് പരിശോധനകൾക്ക് നേതൃത്വം നൽകിയത്. കാഴ്ച പ്രശ്നങ്ങൾ കണ്ടെത്തിയ ഡ്രൈവർമാർക്ക് അവ പരിഹരിക്കുന്നതിനായി കണ്ണടകൾ നിർദ്ദേശിക്കപ്പെട്ടു. കണ്ണടകൾ സബ്സിഡി നിരക്കിൽ ലഭ്യമാക്കി. ഈ സംരംഭം ഇതിനകം 7,000-ൽ അധികം ഡ്രൈവർമാരിൽ എത്തിച്ചേർന്നിട്ടുണ്ട്.

എല്ലാ വർഷവും ലോക കാഴ്ച ദിനം നേത്രസംരക്ഷണത്തിലേക്ക് ശ്രദ്ധ ആകർഷിക്കാൻ ടൈറ്റൻ ഐ+ ന് ലഭിക്കുന്ന ഒരവസരമാണെന്നും ഈ വർഷം ഇന്ത്യൻ റോഡുകൾ സുരക്ഷിതമാക്കുക എന്ന പ്രമേയമാണ് ഞങ്ങൾ എടുത്തിട്ടുള്ളതെന്നും ടൈറ്റൻ കമ്പനി ഐ കെയർ ഡിവിഷൻ മാർക്കറ്റിംഗ് ഹെഡ് മനീഷ് കൃഷ്ണമൂർത്തി പറഞ്ഞു.

ഈ സംരംഭത്തിൻറെ വ്യാപ്തി വിപുലപ്പെടുത്തുന്നതിനായി 'നമ്മ യാത്രി' പോലെയുള്ള പ്ലാറ്റ്ഫോമുകളുമായി ചേർന്ന് ടൈറ്റൻ ഐ പ്ലസ് പ്രവർത്തിക്കുന്നുമുണ്ട്. ഡെലിവറി പാർട്ട്ണർമാർ, റിക്ഷാ ഡ്രൈവർമാർ, കാബ് ഡ്രൈവർമാർ തുടങ്ങി ഗതാഗത മേഖലയിൽ ജോലി ചെയ്യുന്നവർക്കെല്ലാം സൗജന്യ നേത്രപരിശോധനകൾ ലഭ്യമാക്കുന്നുണ്ട്.

ഈ സംരംഭത്തിൻറെ ഭാഗമായി 'ഐ ടെസ്റ്റ് മെനു' എന്ന ഒരു പ്രചരണ വീഡിയോയും പുറത്തിറക്കിയിട്ടുണ്ട്.