2022 ജൂണ്‍ മുതല്‍ പ്രാബല്യത്തില്‍ വരുന്ന ചില പ്രധാന സാമ്പത്തിക മാറ്റങ്ങളാണ് താഴെ നല്‍കുന്നത്

ജൂണിനെ എതിരേല്‍ക്കുമ്പോള്‍ നിത്യജീവതത്തെ സ്വധീനിക്കുന്ന നിരവധി സാമ്പത്തിക മാറ്റങ്ങള്‍ കൂടിയാണ് പ്രാബല്യത്തില്‍ വരുന്നത്. വര്‍ധിച്ച ഭവനവായ്പ പലിശനിരക്കുകള്‍ മുതല്‍ ഗോള്‍ഡ് ഹാള്‍മാര്‍ക്കിങ് വരെ, അവഗണിക്കാന്‍ പാടില്ലാത്ത ചില പ്രധാന മാറ്റങ്ങള്‍ ഇതില്‍ ഉള്‍പ്പെടുന്നു. 2022 ജൂണ്‍ മുതല്‍ പ്രാബല്യത്തില്‍ വരുന്ന ചില പ്രധാന സാമ്പത്തിക മാറ്റങ്ങളാണ് താഴെ നല്‍കുന്നത്.

പ്രതീക്ഷിക്കേണ്ട മാറ്റങ്ങള്‍

പുതുമാസത്തില്‍ എല്‍.പി.ജി, ഇന്ധനവിലക്കയറ്റവും പ്രതീക്ഷിക്കേണ്ടതുണ്ട്. ഇക്കാര്യത്തില്‍ വരും മണിക്കൂറുകളില്‍ കൂടുതല്‍ വ്യക്തത പ്രതീക്ഷിക്കാം. മാസങ്ങള്‍ക്കുശേഷം ആഗോള വിപണിയില്‍ എണ്ണവില 122 ഡോളര്‍ പിന്നിട്ടിരിക്കുകയാണ്. പണപ്പെരുപ്പം നിയന്ത്രിക്കുന്നതിനു വേണ്ടി ഇന്ധനവില നിലനിര്‍ത്താനുള്ള ശ്രമത്തില്‍ സര്‍ക്കാര്‍ ഇന്നുവരെ വിജയിച്ചിട്ടുണ്ട്. പുതുമാസത്തില്‍ ഇതിനു സാധ്യത കുറവാണെന്നാണു വിലയിരുത്തല്‍. നിലവിലെ സാഹചര്യത്തില്‍ എല്‍.പി.ജി. വിലയും കുതിക്കുമെന്നാണു സൂചന.

സിമെന്റ് വില കൂടും

പ്രമുഖ സിമെന്റ് ഉല്‍പ്പാദകരായ ഇന്ത്യ സിമെന്റ്സ് ജൂണ്‍ ഒന്നു മുതല്‍ വില വര്‍ധന പ്രഖ്യാപിച്ചിട്ടുണ്ട്. 2021- 22 സാമ്പത്തിക വര്‍ഷത്തില്‍ നഷ്ടം നേരിട്ട സാഹചര്യത്തിലാണു തീരുമാനം. മൂന്നുഘട്ടമായാകും വില വര്‍ധന.

ജൂണ്‍ ഒന്നിന് തുടങ്ങുന്ന ഒന്നാംഘട്ടത്തില്‍ സിമെന്റ് ചാക്കിന് 20 രൂപയും, ജൂണ്‍ 15 മുതല്‍ 15 രൂപയും, ജൂണ്‍ 30 മുതല്‍ 20 രൂപയും വര്‍ധിപ്പിക്കുമെന്നാണു വ്യക്തമാക്കിയിരിക്കുന്നത്. ഇതാദ്യമായാണ് കമ്പനി ഇത്രയും അധികം വില വര്‍ധിപ്പിക്കുന്നത്.

ജിഎസ്ടി നഷ്ടപരിഹാരം അനുവദിച്ച് കേന്ദ്രം; കേരളത്തിന് എത്ര ലഭിക്കും? ... Read More

തേര്‍ഡ് പാര്‍ട്ടി മോട്ടോര്‍ ഇന്‍ഷുറന്‍സ് പ്രീമിയം

1000 സി.സിയില്‍ കൂടാത്ത സ്വകാര്യ കാറുകള്‍ക്കുള്ള തേര്‍ഡ് പാര്‍ട്ടി ഇന്‍ഷുറന്‍സിന്റെ വാര്‍ഷിക നിരക്ക് 2019- 20ല്‍ 2,072 രൂപയില്‍ നിന്ന് 2,094 രൂപയായി നിജപ്പെടുത്തി. പുതിയ നിരക്കുകള്‍ പ്രകാരം, 1000 സി.സിക്കും 1500 സി.സിക്കും ഇടയില്‍ എന്‍ജിന്‍ ശേഷിയുള്ള സ്വകാര്യ കാറുകളുടെ തേര്‍ഡ് പാര്‍ട്ടി ഇന്‍ഷുറന്‍സ് 2019- 20ല്‍ 3,221 രൂപയില്‍ നിന്ന് 3,416 രൂപയായി ഉയര്‍ത്തി. 1500 സിസിക്ക് മുകളില്‍ എന്‍ജിന്‍ ശേഷിയുള്ള വലിയ സ്വകാര്യ വാഹനങ്ങള്‍ക്ക് പ്രീമിയം 7,890 രൂപയില്‍ നിന്ന് 7,897 രൂപയാകും.

ഇന്ത്യ പോസ്റ്റ് പേമെന്റ് ബാങ്ക് നിരക്ക് മാറ്റങ്ങള്‍

ആധാര്‍ പ്രവര്‍ത്തനക്ഷമമാക്കിയ പേമെന്റ് സിസ്റ്റത്തിനുള്ള ഇഷ്യൂവര്‍ ചാര്‍ജ്ജ് (എ.ഇ.പി.എസ്) നടപ്പിലാക്കിയതായി ഇന്ത്യ പോസ്റ്റ് പേമെന്റ് ബാങ്ക് (ഐ.പി.പി.ബി) പ്രസ്താവിച്ചിട്ടുണ്ട്. ഈ ഫീസ് 2022 ജൂണ്‍ 15 മുതല്‍ നടപ്പിലാക്കും. എ.ഇ.പി.എസ്. ക്യാഷ് പിന്‍വലിക്കല്‍, എ.ഇ.പി.എസ്. ക്യാഷ് ഡെപ്പോസിറ്റ്, എ.ഇ.പി.എസ്. മിനി സ്റ്റേറ്റ്‌മെന്റ് എന്നിവ ഉള്‍പ്പെടെ ആദ്യത്തെ മൂന്ന് എ.ഇ.പി.എസ്. ഇടപാടുകള്‍ പ്രതിമാസം സൗജന്യമായിരിക്കും.

തുടര്‍ന്നുള്ള ഓരോ പണം പിന്‍വലിക്കലിനും, ക്യാഷ് ഡെപ്പോസിറ്റിനും 20 രൂപയും ജി.എസ്.ടിയും ഈടാക്കും. ഒരു മിനി സ്റ്റേറ്റ്‌മെന്റ് ഇടപാടിന് അഞ്ചു രൂപയും ജി.എസ്.ടി. ഈടാക്കും.

എസ്.ബി.ഐ. ഭവന വായ്പ പലിശ നിരക്കുകള്‍

ഇന്ത്യയിലെ ഏറ്റവും വലിയ വായ്പാദാതാവായ സ്റ്റേറ്റ് ബാങ്ക് ഓഫ് ഇന്ത്യ (എസ്.ബി.ഐ) ഭവനവായ്പയുടെ ബാഹ്യ ബെഞ്ച്മാര്‍ക്ക് വായ്പാ നിരക്ക് (ഇ.ബി.എല്‍.ആര്‍) 40 ബേസിസ് പോയിന്റ് വര്‍ധിപ്പിച്ച് 7.05 ശതമാനമാക്കി. ആര്‍.എല്‍.എല്‍.ആര്‍. 6.65 ശതമാനവും സി.ആര്‍.പിയും ആയിരിക്കും. പുതുക്കിയ പലിശ നിരക്ക് 2022 ജൂണ്‍ ഒന്നു മുതല്‍ പ്രാബല്യത്തില്‍ വരും.

ബാങ്കിന്റെ വെബ്‌സൈറ്റ് അനുസരിച്ച് എക്‌സ്റ്റേണല്‍ ബെഞ്ച്മാര്‍ക്ക് അടിസ്ഥാനമാക്കിയുള്ള വായ്പാ നിരക്ക് എന്നാല്‍ ബാഹ്യ ബെഞ്ച്മാര്‍ക്ക് നിരക്ക് (ഇ.ബി.എല്‍.ആര്‍) + ക്രെഡിറ്റ് റിസ്‌ക് പ്രീമിയം (സി.ആര്‍.പി) ആയിരിക്കും. വായ്പകളുടെ മാര്‍ജിനല്‍ കോസ്റ്റ് അധിഷ്ഠിത വായ്പാ നിരക്കുകളില്‍ (എം.സി.എല്‍.ആര്‍) 10 ബേസിസ് പോയിന്റ് വര്‍ധനയും പ്രഖ്യാപിച്ചിട്ടുണ്ട്. 2022 മേയ് 15 മുതല്‍ ഇവ പ്രാബല്യത്തില്‍ വന്നു.

വാഹന ഇന്‍ഷുറന്‍സും ഇനി പിടിച്ചാല്‍ കിട്ടില്ല... Read More

ആക്സിസ് ബാങ്കിന്റെ സേവിങ്സ് അക്കൗണ്ട് നിരക്കുകള്‍

സ്വകാര്യ പണമിടപാട് സ്ഥാപനമായ ആക്‌സിസ് ബാങ്ക്, അര്‍ദ്ധ- നഗര/ ഗ്രാമീണ മേഖലകളിലെ ഈസി സേവിങ്സ്, ശമ്പള പദ്ധതികളുടെ പ്രതിമാസ മിനിമം ബാലന്‍സ് 15,000 രൂപയില്‍ നിന്ന് 25,000 രൂപയാക്കും. ടേം അക്കൗണ്ടിന് ഇത് ഒരു ലക്ഷം രൂപയാണ്. ഈ നിരക്കുകള്‍ 2022 ജൂണ്‍ ഒന്നു മുതല്‍ പ്രാബല്യത്തില്‍ വരും.

ഗോള്‍ഡ് ഹാള്‍മാര്‍ക്കിങ്

2022 ജൂണ്‍ ഒന്നു മുതല്‍, നിര്‍ബന്ധിത ഹാള്‍മാര്‍ക്കിങ്ങിന്റെ രണ്ടാം ഘട്ടം പ്രാബല്യത്തില്‍ വരും. ഇത് നിലവിലുള്ള 256 ജില്ലകളിലും 32 പുതിയ ജില്ലകളിലും അസൈയിങ് ആന്‍ഡ് ഹാള്‍മാര്‍ക്കിങ് സെന്ററുകളുടെ (എ.എച്ച്.സി) കീഴിലുള്ള സ്വര്‍ണാഭരണങ്ങളുടെയും ഹാള്‍മാര്‍ക്കിങ് പൂര്‍ണമായും നിര്‍ബന്ധമാക്കും. 14, 18, 20, 22, 23, 24 കാരറ്റ് ഭാരമുള്ള സ്വര്‍ണാഭരണങ്ങള്‍ മാത്രമേ ഈ 288 ജില്ലകളില്‍ വില്‍ക്കാന്‍ സാധിക്കൂ, അതും ഹാള്‍മാര്‍ക്കിങ്ങോടു കൂടി.