അഞ്ചു വര്‍ഷത്തോളം നീണ്ടു നില്‍ക്കുന്ന ലൈന്‍ ഓഫ് ക്രെഡിറ്റ് ആശയമാണ് നടപ്പാക്കുന്നത്

 
കേരളാ സര്‍ക്കാരിനു കീഴില്‍ പ്രവര്‍ത്തിക്കുന്ന കേരളാ ഫിനാന്‍ഷ്യല്‍ കോര്‍പ്പറേഷന്‍ (കെ.എഫ്.സി) ചെറുകിട- ഇടത്തരം സംരംഭങ്ങള്‍ക്കായി സ്പെഷല്‍ വായ്പാ പദ്ധതി അവതരിപ്പിച്ചു. സംരംഭങ്ങളുടെ നടത്തിപ്പ് സുഗമമാക്കുകയാണ് ലക്ഷ്യം. പദ്ധതി പ്രകാരം സര്‍ക്കാര്‍ വകുപ്പുകള്‍/ ഏജന്‍സികള്‍/ പൊതുമേഖലാ സ്ഥാപനങ്ങള്‍ എന്നിവയില്‍ നിന്ന് ലഭിക്കുന്ന ഓര്‍ഡറുകളുടെ 75 ശതമാനം തുക വായ്പയായി നല്‍കുമെന്നു കോര്‍പ്പറേഷന്‍ വ്യക്തമാക്കി. അഞ്ചു വര്‍ഷത്തോളം നീണ്ടു നില്‍ക്കുന്ന ലൈന്‍ ഓഫ് ക്രെഡിറ്റ് ആശയമാണ് നടപ്പാക്കുന്നത്.

തിരിച്ചടവ് ജോലിയുടെ കാലാവധിയേയും ജോലി നല്‍കിയ അതോറിറ്റിയില്‍ നിന്ന് ഫണ്ട് ലഭിക്കുന്നതിനേയും ആശ്രയിച്ചിരിക്കും. പലിശ നിരക്ക് എട്ട് ശതമാനം മുതലാകും. എം.എസ്.എം.ഇയുടെ ക്രെഡിറ്റ് റേറ്റിങ് സ്‌കോറുമായി ബന്ധിപ്പെട്ടാകും പലിശ നിശ്ചയിക്കുക.

ആവശ്യക്കാരെ തേടി എത്തും സഹ-വായ്പ പദ്ധതി ... Read More

കോവിഡ് -19 സാഹചര്യം കണക്കിലെടുത്ത്, എം.എസ്.എം.ഇയുടെ ക്രെഡിറ്റ് റേറ്റിങ് കോവിഡിന് മുമ്പുള്ള കാലയളവിലെ ബാലന്‍സ് ഷീറ്റിന്റെ വിശകലനത്തെ അടിസ്ഥാനമാക്കിയാകും കണക്കാക്കുക. വര്‍ക്ക് നല്‍കിയ അതോറിറ്റി ബില്‍ സ്വീകരിച്ചു കഴിഞ്ഞാല്‍, എം.എസ്.എം.ഇകള്‍ക്ക് ഉടന്‍ തന്നെ ബില്‍ തുകയുടെ 90 ശതമാനം വരെ ഡിസ്‌കൗണ്ടിങ്ങിലൂടെ ലഭിക്കും. അന്തിമ ബില്ലുകള്‍ക്കായി ഈടില്ലാതെയും ഡിസ്‌കൗണ്ടിങ് നടത്താം.

രാജ്യത്തിന്റെ സാമ്പത്തിക വളര്‍ച്ചയില്‍ എം.എസ്.എം.ഇകള്‍ വളരെ പ്രധാന പങ്ക് വഹിക്കുന്നുണ്ട്. എന്നാല്‍ വര്‍ക്കുകള്‍ നടപ്പിലാക്കുന്നതിനുള്ള ഫണ്ടിനും, ബില്ലുകള്‍ പണമാക്കി മാറ്റുന്നതിനും മറ്റും ഇവര്‍ തിരിച്ചടി നേരിടുന്നു. കോവിഡ് കാലയളവില്‍ ഇത്തരം പ്രശ്നങ്ങള്‍ പരിഹരിക്കുന്നതിന് കോര്‍പ്പറേഷന്റെ പുതിയ പദ്ധതി സഹായമാകും. പദ്ധതിക്കു യോഗ്യത നേടുന്നതിന് അപേക്ഷകന്‍ എം.എസ്.എം.ഇ. ഉദ്യം രജിസ്റ്റര്‍ ചെയ്തിരിക്കണം. ജി.എസ്.ടി. രജിസ്ട്രേഷനും ഏറ്റവും പുതിയ ഓഡിറ്റ് ചെയ്ത ബാലന്‍സ് ഷീറ്റും നിര്‍ബന്ധമാണ്.

വനിതകള്‍ക്ക് സ്വയം തൊഴില്‍ വായ്പ... Read More

രജിസ്ട്രേഷനില്‍ നിന്ന് ഒഴിവാക്കപ്പെട്ട എം.എസ്.എം.ഇകള്‍ക്ക് ജി.എസ്.ടി. രജിസ്ട്രേഷന്‍ ബാധകമല്ല. രണ്ടു കോടി രൂപ വരെ വാര്‍ഷിക വിറ്റുവരവുള്ള എം.എസ്.എം.ഇകളെ ഓഡിറ്റഡ് ബാലന്‍സ് ഷീറ്റില്‍നിന്ന് ഒഴിവാക്കിയിട്ടുണ്ട്. അഞ്ച് വര്‍ഷത്തേയ്ക്കുള്ള ഒരു ലൈന്‍ ഓഫ് ക്രെഡിറ്റ് ആയാകും വായ്പ അനുവദിക്കുക. എം.എസ്.എം.ഇകളുടെ ഗ്യാരന്റി, പദ്ധതി നടപ്പാക്കല്‍ വായ്പ, ബില്‍ ഡിസ്‌കൗണ്ടിങ്, ഗവണ്‍മെന്റ് പ്രോമിസറി നോട്ട് ഡിസ്‌കൗണ്ടിങ്, എക്യുപ്മെന്റ് ഫിനാന്‍സ് തുടങ്ങിയ സൗകര്യങ്ങളുമായി വായ്പ ബന്ധപ്പെട്ടിരിക്കുന്നു.

കമ്പനികള്‍ക്കും രജിസ്റ്റര്‍ ചെയ്ത സഹകരണ സംഘങ്ങള്‍ക്കും 20 കോടി രൂപയും മറ്റുള്ളവയ്ക്ക് എട്ടു കോടി രൂപയുമാണ് പരമാവധി സഹായം ലഭിക്കുക. എന്നാല്‍ ഗവണ്‍മെന്റ് പ്രോമിസറി നോട്ടുകളുടെ ഗ്യാരണ്ടി, ഡിസ്‌കൗണ്ടിങ് എന്നിവ വഴി 50 കോടി രൂപ വരെ സഹായം ലഭിക്കും. അഞ്ചു വര്‍ഷമാണ് ലൈന്‍ ഓഫ് ക്രെഡിറ്റിന്റെ സാധുത.

ഉപഭോക്താക്കള്‍ക്ക് കോര്‍പ്പറേഷനുമായി കരാറിലെത്തിയാല്‍ അഞ്ച് വര്‍ഷ കാലയളവില്‍ ചുരുങ്ങിയ നടപടിക്രമത്തില്‍ സാമ്പത്തിക സഹായം ലഭിക്കും. എം.എസ്.എം.ഇകളില്‍ നിന്നുള്ള പ്രതികരണം വിലയിരുത്തി പദ്ധതി അവലോകനം ചെയ്യും. നടപ്പു സാമ്പത്തിക വര്‍ഷം പദ്ധതി പ്രകാരം 500 കോടി രൂപയെങ്കിലും വിതരണം ചെയ്യാനാണ് കേരള ഫിനാന്‍ഷ്യല്‍ കോര്‍പ്പറേഷന്‍ ലക്ഷ്യമിടുന്നത്.