• ഇൻഫോപാർക്കിലെ എവിജിസി എക്സ് ആർ അരീന സന്ദർശിച്ച് മന്ത്രി

കൊച്ചി: ജനുവരിയിൽ നടക്കാൻ പോകുന്ന ആഗോള നിക്ഷേപക സംഗമത്തിൽ അനിമേഷൻ വിഷ്വൽ ഇഫക്ട്സ് ഗെയിമിംഗ് കോമിക്സ് എക്സ്റ്റൻഡഡ് റിയാലിറ്റി വിഭാഗത്തിനെ പ്രത്യേക മേഖലയായി പരിഗണിക്കുമെന്ന് വ്യവസായ മന്ത്രി പി രാജീവ് പറഞ്ഞു. ഇൻഫോപാർക്കിൽ ആരംഭിച്ച എവിജിസി എക്സർ (എവിജിസി-എക്സ് ആർ) അരീന സന്ദർശിക്കവെ വിവിധ കമ്പനികളുടെ പ്രതിനിധികളുമായി നടത്തിയ ചർച്ചയിലാണ് മന്ത്രി ഇക്കാര്യം അറിയിച്ചത്.

സംസ്ഥാന സർക്കാരിൻറെ എവിജിസി-എക്സ് ആർ പോളിസിയുടെ ചുവടുപിച്ച് ഈ മേഖലയിലെ പ്രൊഫഷണലുകൾക്ക് മാത്രമായി കോ-വർക്കിംഗ് സ്പേസ് ആദ്യമായി ആരംഭിച്ചത് ഇൻഫോപാർക്കിലാണ്.

ആഗോളനിലവാരത്തിലുള്ള മലയാളി പ്രതിഭകളാണ് ഇന്ന് ലോകത്തെ മുൻനിര അനിമേഷൻ മേഖലയിലുള്ളതെന്ന് മന്ത്രി പറഞ്ഞു. എവിജിസി-എക്സ് ആർ മേഖല കേരളത്തിൽ സജീവമാകുന്നതോടെ ഈ പ്രതിഭകൾ നമ്മുടെ നാട്ടിലേക്ക് തിരികെയെത്തും. കൂടുതൽ നിക്ഷേപം ഈ മേഖലയിലേക്ക് ആകർഷിക്കുന്നതിനായി ആഗോള നിക്ഷേപക സംഗമത്തിൽ എവിജിസി-എക്സ് ആറിനെ പ്രത്യേകമായി പരിഗണിക്കുമെന്നും മന്ത്രി പറഞ്ഞു.

കേരളത്തിലെ പ്രമുഖ സിനിമ നിർമ്മാണ കമ്പനികൾ ഫിലിം സിറ്റി തുടങ്ങാനായിട്ടുള്ള താത്പര്യം പ്രകടിപ്പിച്ചിട്ടുണ്ട്. ഇത്തരം ഫിലിം സിറ്റികളിൽ അനിമേഷന് പ്രത്യേക പ്രാധാന്യമുണ്ടാകും. എവിജിസി- എക്സ് ആർ മേഖലയിൽ വലിയ അവസരങ്ങളുണ്ടാകുമെന്നും മന്ത്രി പറഞ്ഞു.

എവിജിസി-എക്സ് ആറിന് വേണ്ടി മാത്രമായി സംസ്ഥാനത്ത് ആദ്യമായി തുടങ്ങിയ സംവിധാനമാണ് ഇൻഫോപാർക്കിലേതെന്ന് സിഇഒ സുശാന്ത് കുറുന്തിൽ ചൂണ്ടിക്കാട്ടി. എവിജിസി-എക്സ് ആറിലെ ഓരോ വിഭാഗത്തിനും വേണ്ടി പ്രത്യേകം സംവിധാനം ഉണ്ടാകുന്ന രീതിയിലേക്ക് വളർച്ച നേടാൻ ശ്രമിക്കും. എവിജിസി-എക്സ് ആർ വ്യവസായം ആവശ്യപ്പെടുന്ന അടിസ്ഥാന സൗകര്യങ്ങൾ ഒരുക്കാൻ ഇൻഫോപാർക്ക് പരമാവധി ശ്രമിക്കുമെന്നും അദ്ദേഹം ഉറപ്പ് നൽകി.

2032 ആകുമ്പോഴേക്കും നിലവിലുള്ള 2,60,000 തൊഴിലവസരങ്ങളിൽ നിന്ന് 2.6 ബില്യൺ തൊഴിലവസരങ്ങളുള്ള മേഖലയായി എവിജിസി-എക്സ് ആർ മാറുമെന്ന് സൊസൈറ്റി ഓഫ് എവിജിസി-എക്സ് ആർ ഇൻസ്റ്റിറ്റിയൂഷൻസ് ഇൻ കേരള (സൈക്ക്) സെക്രട്ടറി ശരത് ഭൂഷൺ പറഞ്ഞു. അടുത്ത അഞ്ചു വർഷങ്ങൾക്കുള്ളിൽ ഈ രംഗത്തുനിന്നുള്ള വരുമാനം നിലവിലുള്ള മൂന്ന് ബില്യൺ ഡോളറിൽ നിന്നും 26 ബില്യൺ ഡോളർ ആയി മാറും എന്നാണ് അനുമാനം. വരുന്ന രണ്ട് വർഷം ഈ മേഖലയിൽ വേണ്ട പിന്തുണ നൽകിയാൽ ഈ വിപണിയുടെ അഞ്ച് മുതൽ 10% വരെ കേരളത്തിന് നേടാമെന്നും അദ്ദേഹം പറഞ്ഞു.

ഇൻഫോപാർക്കിലെ എവിജിസി-എക്സ് ആർ അരീന സന്ദർശിച്ച വ്യവസായ മന്ത്രി പി രാജീവ് വിവിധ അനിമേഷൻ കമ്പനികളുടെ പ്രതിനിധികളുമായി സംസാരിക്കുന്നു. ഇൻഫോപാർക്ക് സിഇഒ സുശാന്ത് കുറുന്തിൽ സമീപം.

എവിജിസി-എക്സ് ആർ ഉള്ളടക്കത്തിൽ നിലവിൽ തന്നെ നൂറിലധികം സ്റ്റുഡിയോകൾ കേരളം കേന്ദ്രീകരിച്ച് പ്രവർത്തിക്കുന്നുണ്ട്. ബോളിവുഡിലും ഹോളിവുഡിലും പ്രവർത്തിക്കുന്ന കമ്പനികൾ ഇന്ന് കേരളത്തിൽ നിന്നുണ്ട്.

രാജ്യത്തെ എവിജിസി-എക്സ് ആർ വിപ്ലവത്തിൽ സുപ്രധാന ഭാഗഭാക്കാകാനാണ് കേരളത്തിൻറെ ശ്രമമെന്ന് മന്ത്രി രാജീവ് പറഞ്ഞു. തൊഴിലവസരങ്ങൾ സൃഷ്ടിക്കുന്നതിലും വരുമാന വർദ്ധനവിലും സംസ്ഥാനത്തിൻറെ ആകെ വളർച്ചാ നിരക്ക് ത്വരിതപ്പെടുത്തുന്നതിലും ഈ മേഖല ഏറെ പ്രതീക്ഷ നൽകുന്നുണ്ട്. മികച്ച പ്രൊഫഷണലുകളുടെ സഹായത്തോടെ രാജ്യത്തെ എവിജിസി-എക്സ് ആർ ഹബ്ബായി മാറാൻ കേരളം ഊർജ്ജിതമായി ശ്രമിക്കുകയാണ്. എവിജിസി-എക്സ് ആർ സ്റ്റാർട്ടപ്പുകളും പരിചയസമ്പന്നരായ പ്രഫഷണലുകളും കേരളത്തിൽ ഉണ്ടെന്നത് മുതൽക്കൂട്ടാണ്.

രാജ്യത്തെ ഗെയിമിംഗ് മേഖല നിലവിൽ മൂന്ന് ബില്യൺ ഡോളറിൻറെ വിപണിയാണ്. 568 ദശലക്ഷം വരിക്കാരാണ് ഈ മേഖലയിലുള്ളത്. വർദ്ധിച്ചുവരുന്ന ഈ ആവശ്യം ഉപയോഗപ്പെടുത്തി കേരളത്തിലെ എവിജിസി-എക്സ് ആർ മേഖല മികച്ച വളർച്ച നേടുകയും അതുവഴി തൊഴിലവസരങ്ങൾ സൃഷ്ടിക്കുകയും സംസ്ഥാനത്തിൻറെ പൊതുവളർച്ചയ്ക്ക് മികച്ച സഹായം നൽകുകയുമാണ് ചെയ്യുന്നത് . വിദ്യാഭ്യാസം, ആരോഗ്യം, വിനോദം എന്നീ മേഖലകളിലെ എവിജിസി-എക്സ് ആർ ഉപയോഗം മികച്ച അവസരങ്ങളാണ് നൽകുന്നത്. രാജ്യത്തെ ഡിജിറ്റൽ കണ്ടെൻറിൻറെ നേതൃസ്ഥാനത്ത് എത്താൻ ഇത്തരം ഉദ്യമങ്ങൾ കേരളത്തെ സഹായിക്കും.