ക്രെഡിറ്റ് കാർഡ് റിവാർഡ് പോയിന്റുകളുമായി ബന്ധപ്പെട്ട നിയമങ്ങൾ പരിഷ്കരിച്ചതാണ്

എൻപിഎസിൽ നിന്ന് ഭാഗികമായി പണം പിൻവലിക്കുന്നതിൽ വന്ന മാറ്റങ്ങൾ, ലോക്കർ നിയമങ്ങളിലെ മാറ്റങ്ങൾ, ക്രെഡിറ്റ് കാർഡ് ഉടമകൾ അറിയേണ്ട ചില കാര്യങ്ങൾ തുടങ്ങി പുതുവർഷം മുതൽ ധനകാര്യ രംഗത്ത് ചില മാറ്റങ്ങളുമുണ്ട്. എസ്ബിഐ കാർഡ്സ്, എച്ച്ഡിഎഫ്സി എന്നിവ ക്രെഡിറ്റ് കാർഡ് റിവാർഡ് പോയിന്റുകളുമായി ബന്ധപ്പെട്ട നിയമങ്ങൾ പരിഷ്കരിച്ചതാണ് ഒരു പ്രധാന മാറ്റം. ഇൻഷുറൻസ് പോളിസികൾ വാങ്ങുന്നതിലുമുണ്ട് ചില മാറ്റങ്ങൾ. ഉപഭോക്താക്കൾ ഇൻഷുറൻസ് പോളിസി വാങ്ങാൻ കെവൈസി വിവരങ്ങൾ ഇനി നിർബന്ധമായി നൽകണം. ജനുവരി ഒന്ന് മുതലുള്ള ചില പ്രധാന മാറ്റങ്ങൾ അറിയാം

2023 ജനുവരി ഒന്ന് മുതൽ എൻപിഎസിൽ നിന്ന് ഭാഗികമായി പണം പിൻവലിക്കാൻ സർക്കാർ മേഖലയിലെ ഇടപാടുകർക്ക് കഴിയില്ല. പെൻഷൻ ഫണ്ട് റെഗുലേറ്ററി ആൻഡ് ഡെവലപ്മെന്റ് അതോറിറ്റി ആണ് ഇക്കാര്യം വ്യക്തമാക്കിയത്. ഈ മാറ്റം കേന്ദ്ര,സംസ്ഥാന സർക്കാർ ജീവനക്കാരായ വരിക്കാരെ ബാധിക്കും. കേന്ദ്ര സ്വയംഭരണ സ്ഥാപനങ്ങളിലെ ജീവനക്കാർക്കും ഇത് ബാധകമാകും. അതേസമയം ഭാഗികമായി പണം പിൻവലിക്കാനുള്ള സൗകര്യം സർക്കാരിതര എൻപിഎസ് വരിക്കാർക്കും കോർപ്പറേറ്റ്ഉപയോക്താക്കൾക്കും തുടർന്നും ലഭ്യമാകും. 2021 ജനുവരിയിൽ, കൊവിഡ് -19ന്റെ പശ്ചാത്തലത്തിലാണ് എൻപിഎസിന് കീഴിൽ ഭാഗിക പിൻവലിക്കലുകൾക്ക് അനുമതി നൽകിയത്.

2022 പഠന വർഷം, കൂടുതൽ വളർച്ചയ്ക്കുള്ള ചവിട്ടുപടിയെന്ന് ബൈജു രവീന്ദ്രൻ... Read More

ക്രെഡിറ്റ് കാർഡ് ഉപയോഗിക്കുന്നുണ്ടോ ?

എസ്ബിഐ കാർഡ്സ് ക്രെഡിറ്റ് കാർഡ് ഉടമകളുടെ റിവാർഡ് പോയിന്റുകൾ സംബന്ധിച്ച നിയമങ്ങൾ പരിഷ്കരിച്ചു. അതുപോലെ 2023 ജനുവരി ഒന്നു മുതൽ എച്ച്ഡിഎഫ്സി ബാങ്ക് അതിന്റെ ക്രെഡിറ്റ് കാർഡ് ചാർജുകളും റിവാർഡ് പോയിന്റുകളും പരിഷ്കരിച്ചു. ആമസോണിലെ ഓൺലൈൻ കാർഡ് വിനിയോഗത്തിലൂടെ 10X റിവാർഡ് പോയിന്റുകൾ ലഭിക്കും. സിംപ്ലിക്ലിക്ക്, സിംപ്ലിക്ലിക്ക് അഡ്വാന്റേജ് എന്നിവ വഴി 5X റിവാർഡ് പോയിന്റുകളായിരിക്കും ഇനി ലഭിക്കുക. എന്നാൽ ബുക്ക് മൈ ഷോ, ക്ലിയർ ട്രിപ്സ് എന്നീ പ്ലാറ്റ്ഫോമുകളിൽ പണം ചെലവഴിക്കുമ്പോൾ കാർഡിൽ 10X റിവാർഡ് പോയിന്റുകൾ ലഭിക്കും.

എച്ച്ഡിഎഫ്സി ബാങ്ക് സ്മാർട്ട്ബൈ ഓൺലൈൻ പോർട്ടലിൽ ഫ്ലൈറ്റ് ടിക്കറ്റുകൾക്കും ഹോട്ടൽ ബുക്കിംഗുകൾക്കുമുള്ള റിവാർഡ് പോയിന്റുകൾ ഈ മാസത്തിൽ പരിമിതപ്പെടുത്തും. ഇൻഫിനിയ കാർഡ് ഉടമകൾക്ക് പരമാവധി 1,50,000 റിവാർഡ് പോയിന്റുകൾ ആണ് ലഭിക്കുക., ഡൈനേഴ്സ് ബ്ലാക്ക് കാർഡിന് 75,000 റിവാർഡ് പോയിന്റുകൾ മറ്റ് കാർഡുൾക്ക് 50,000 റിവാർഡ് പോയിൻറ് എന്നിങ്ങനെയാണ് പരിധി നിശ്ചയിച്ചിരിക്കുന്നത്.

കേരളത്തിലെ സാങ്കേതിക സംരംഭകത്വത്തിന് ഉത്തേജനം പകരാൻ ഫാബ് അക്കാദമി... Read More

മാറുന്ന ലോക്കർ നിയമങ്ങൾ

ജനുവരി ഒന്നു മുതൽ ലോക്കർ നിയമങ്ങളിൽ മാറ്റങ്ങൾ വരുന്നു. ബാങ്കിന്റെ അശ്രദ്ധ മൂലം ലോക്കറിൽ സൂക്ഷിച്ച വസ്തുക്കൾ നഷ്ടപ്പെട്ടാൽ ഉപഭോക്താക്കൾക്ക് നഷ്ട പരിഹാരം നൽകാൻ ബാങ്കുകൾക്ക് ബാധ്യതയുണ്ട്. ലോക്കറിൽ സൂക്ഷിച്ചിരിക്കുന്ന വിലപിടിപ്പുള്ള വസ്തുക്കൾ മോഷണം പോകുകയോ തീപിടിത്തം മൂലമോ കെട്ടിടം തകർന്നതു മൂലമോ നശിപ്പിക്കപ്പെട്ടാലോ ഉപഭോക്താക്കൾക്ക് ബാങ്ക് ചാർജിന്റെ 100 ഇരട്ടി വരെ ലഭിക്കും. ബാങ്കുകൾക്ക് അവരുടെ ലോക്കർ കരാറുകളിൽ അന്യായമായ നിബന്ധനകളോ വ്യവസ്ഥകളോ ഉൾപ്പെടുത്താൻ അധികാരമുണ്ടായിരിക്കില്ല.

ലോക്കർ ഉടമ മരിച്ചാൽ ലോക്കറിൽ സൂക്ഷിച്ചിരിക്കുന്ന വസ്തുക്കൾ ലഭിക്കുന്നതിന് നോമിനി ലോക്കറിൽ സൂക്ഷിച്ചിരിക്കുന്ന വസ്തുക്കളുടെ ലിസ്റ്റും അക്കൗണ്ട് ഉടമയുടെ മരണ സർട്ടിഫിക്കറ്റും നോമിനിയുടെ ഐഡന്റിറ്റി കാർഡുകളും നൽകണം. ബാങ്ക് ഇത് സ്ഥിരീകരിച്ച ശേഷം മാത്രമേ നോമിനിക്ക് വസ്തുക്കൾ എടുക്കാനാകു.ലോക്കർ ഉപയോഗവുമായി ബന്ധപ്പെട്ട വിവരങ്ങൾ ലോക്കർ തുറക്കുമ്പോഴെല്ലാം ഇനി ഉടമക്ക് ലഭിക്കും. ബാങ്ക് ഇ-മെയിലിലൂടെയോ എസ്എംഎസിലൂടെയോ ഉപഭോക്താവിനെ അറിയിക്കണം. ഇത്തരം അലേർട്ടുകളിലൂടെ നിയമവിരുദ്ധമായ ലോക്കർ ഉപയോഗം തടയാൻ ആകും.