ചിന്തകൊണ്ടും പ്രവൃത്തികൊണ്ടും എന്തും കീഴടക്കാൻ കഴിയുന്നവരാണ് മനുഷ്യർ. ഈ മനുഷ്യരിൽ തന്നെ ചിന്ത-പ്രവർത്തന ശേഷി വ്യത്യസ്തമായിരിക്കുന്നു. ഈ ചിന്തയിലുണ്ടാവുന്ന വ്യതിയാനങ്ങൾ മനുഷ്യനെ മാനസികവും ശാരീരികവുമായി ബാധിക്കുന്നു. പല മാനസിക രോഗങ്ങൾക്കും കാരണം അവന്റെ വേറിട്ട ചിന്തയാണ്. ഇത്തരത്തിൽ ഉണ്ടാവുന്ന ഒരു മാനസിക രോഗമാണ് രോഗഭയം. അസുഖ ഉത്കണ്ഠ രോഗം ( Illness Anxiety Disorder - IAD) അഥവാ ഹൈപ്പോകോൺഡ്രിയാസിസ് ( hypochondriasis) എന്നറിയപ്പെടുന്ന ഈ ഭയം സാധാരണ ആരോഗ്യ പ്രശ്നങ്ങളേക്കാൾ ഗുരുതരമാണെന്നും പഠനം ചൂണ്ടിക്കാട്ടുന്നു. ഈ തകരാറുള്ള വ്യക്തികൾ തങ്ങളെ ബാധിച്ചിരിക്കുന്ന രോഗത്തെക്കുറിച്ച് അമിതമായ ഭയമുള്ളവരായിരിക്കുമെന്ന് മാത്രമല്ല ആ ഭയം മറികടക്കാൻ പലതരത്തിലുള്ള കാര്യങ്ങൾ ഇവർ ചെയ്യുകയും ചെയ്യും. ആരോഗ്യ പ്രശ്നങ്ങൾ ഇടയ്ക്കിടെ ചർച്ച ചെയ്യപ്പെടുന്ന കുടുംബാന്തരീക്ഷത്തിൽ വളരുന്ന വ്യക്തികൾക്കിടയിൽ ഈ മാനസികാവസ്ഥയ്ക്കുള്ള സാധ്യത കൂടുതലാണെന്നാണ് പഠനങ്ങൾ പറയുന്നത്. കൂടാതെ കുട്ടിക്കാലത്ത് ഗുരുതരമായ അസുഖങ്ങൾ ബാധിച്ചവർക്കും കുടുംബത്തിലെ മറ്റേതെങ്കിലും വ്യക്തികൾ ഗുരുതരമായ അസുഖങ്ങളിൽ മരണപ്പെട്ടവർക്കും ഈ ഭയം പൊതുവിൽ കൂടുതലായിരിക്കും. ആരോഗ്യ വിവരങ്ങളെക്കുറിച്ച് കൂടുതൽ അറിയാൻ ഇൻറർനെറ്റിനെയും സോഷ്യൽ മീഡിയ പ്ലാറ്റ്ഫോമുകളെയും കൂടുതലായി ഉപയോഗിക്കുന്നവരിലും ഈ പ്രവണത കൂടുതലായിരിക്കുമെന്നും പഠനങ്ങൾ പറയുന്നു. രോഗത്തെക്കുറിച്ചുള്ള വ്യക്തിയുടെ ആശങ്ക, അവന്റെ പ്രവൃത്തി, കുടുംബജീവിതം, സാമൂഹിക ജീവിതം എന്നിവയെ കാര്യമായി ബാധിക്കുന്നു. രോഗത്തെ കുറിച്ചുള്ള ഉത്കൺഠയാണ് വ്യക്തികളിൽ പലപ്പോഴും വിഷാദരോഗരോഗങ്ങളിൽ കൊണ്ടെത്തിക്കും.

രോഗഭയമുള്ള വ്യക്തികളിൽ കാണപ്പെടുന്ന പൊതുസ്വഭാവങ്ങൾ

• മറ്റുള്ളവരിൽ നിന്ന് സമാധാന വാക്കുകൾ അല്ലെങ്കിൽ ധൈര്യം പകരുന്ന വാക്കുകൾക്കായി കാതോർക്കുന്നു.
• താൻ രോഗരഹിതനാണെന്നു ഉറപ്പു വരുത്തുന്നതിനായി പലവിധ രോഗനിർണ്ണയ ടെസ്റ്റുകൾക്കു വിധേയരാവുകയും പല തവണ ഇതാവർത്തിക്കുകയും ചെയ്യുന്നു.
• തന്റെ അനാരോഗ്യത്തെ കുറിച്ച് വ്യാകുലപ്പെടുന്നു.
• തന്റെ ആരോഗ്യനിലയെ കുറിച്ചുള്ള വിവരങ്ങൾ ഇന്റർനെറ്റ്, ആരോഗ്യമാസികകൾ, മറ്റു പുസ്തകങ്ങൾ മുതലായവ വഴി ശേഖരിക്കുന്നു.
• രോഗകാരണങ്ങളാൽ ദൈനംദിന പ്രവർത്തനങ്ങളിൽ നിന്നും ഉൾവലിയുന്നു.
• രോഗവിമുക്തനാണെന്നു വൈദ്യപരിശോധനയിൽ തെളിയിക്കപ്പെട്ടാലും തന്റെ അനാരോഗ്യത്തെ കുറിച്ചുള്ള ഭയം, ഉത്കൺഠ, ആശങ്ക എന്നിവ വർധിക്കുന്നു.
• ശാരീരിക പ്രവൃത്തികൾ ശരിയായി നടക്കുന്നുണ്ടോയെന്നു തുടർച്ചയായി പരീക്ഷിക്കുന്നു.
• അവരുടെ രോഗത്തെകുറിച്ച് ഓർമിപ്പിക്കുന്ന സന്ദർഭങ്ങൾ, മറ്റു രോഗികൾ, ആസ്പത്രികൾ മുതലായവ ഒഴിവാക്കുന്നു.

ഇതിൽ നിന്നും മറികടക്കാൻ എന്ത് ചെയ്യണം

• തനിക് എന്താണ് സംഭവിച്ചുകൊണ്ടിരിക്കുന്നത് എന്ന അറിവുതന്നെ ഇതിൽ നിന്ന് പുറത്തുവരുവാൻ അവനെ ശക്തനാക്കുന്നു.
• ഇങ്ങനെ ഉള്ളവർ രോഗലക്ഷണങ്ങൾ ഇൻറർനെറ്റിൽ അന്വേഷിയ്ക്കുന്നതും, മറ്റുള്ളവരുമായി തന്റെ രോഗലക്ഷണങ്ങളെ കുറിച്ച് ചർച്ച ചെയ്യുന്നതും പരമാവധി ഉപേക്ഷിക്കുക.
• ഏതെങ്കിലും തരത്തിലുള്ള സംശയങ്ങൾ ഉണ്ടെങ്കിൽ വിദഗ്ധരുടെ അടുക്കൽ നിന്നുതന്നെ അതിനെക്കുറിച്ചുള്ള ശരിയായ അറിവ് നേടുക.
• റിലാക്സേഷൻ എക്സെർസൈസുകൾ പരമാവധി പരിശീലിക്കുന്നതും ഇത്തരം ചിന്തകളിൽ നിന്ന് മനസ്സിനെ വ്യതിചലിപ്പിക്കുവാൻ പരിശീലിക്കുന്നതും വളരെയേറെ ഗുണകരമായിരിക്കും.
• മരുന്ന്, സൈക്കോതെറാപ്പി എന്നീ ചികിത്സാരീതികൾ ഇന്ന് ലഭ്യമാണ്. അത്യാവശ്യഘട്ടത്തിൽ (ഇതേ അവസ്ഥ 6 മാസത്തിൽ കൂടുതൽ അനുഭവപ്പെട്ടാൽ) ഒരു മാനസികാരോഗ്യ വിദഗ്ധനെ കണ്ടു വേണ്ട രീതിയിൽ ചികിത്സ നേടുക.

ഹെൽത്ത് ടിപ്സുകൾ ദിവസവും ലഭിക്കുവാൻ ഈ പോർട്ടൽ ഫോളോ ചെയ്യുക.

ആരോഗ്യകരമായ ജീവിതത്തിൽ മനഃശാന്തിക്കുള്ള പ്രാധാന്യം... Read More