വെബ്‌സൈറ്റ് ഹാക്ക് ചെയ്യപ്പെട്ടാലും ഉപഭോക്താവിന്റെ കാര്‍ഡ് വിവരങ്ങള്‍ നഷ്ടമാകില്ല

ഓണ്‍ലൈന്‍ പണമിടപാടുകള്‍ സുരക്ഷിതമാക്കുന്നതിനായി റിസര്‍വ്  ബാങ്ക് ഓഫ് ഇന്ത്യയുടെ പുതിയ നിയമങ്ങള്‍ ഇന്ന് നിലവില്‍ വന്നു. ഓണ്‍ലൈന്‍ ഇടപാടുകളില്‍ വര്‍ദ്ധിച്ചു വരുന്ന തട്ടിപ്പുകള്‍ തടയുക എന്ന ലക്ഷ്യത്തോടെയാണ് ആര്‍ബിഐയുടെ പുതിയ നീക്കം. ഡെബിറ്റ് കാര്‍ഡോ ക്രെഡിറ്റ് കാര്‍ഡോ  ഉപയോഗിച്ച് ഓണ്‍ലൈന്‍ ഇടപാടുകള്‍ നടത്തുന്നവര്‍ ഇനി മുതല്‍ കാര്‍ഡ് വിവരങ്ങള്‍ പങ്കിടേണ്ട ആവശ്യമില്ല. 

ഓണ്‍ലൈന്‍ പേയ്മെന്റുകള്‍ക്കായി ഉപയോഗിക്കുന്ന കാര്‍ഡുകള്‍ക്ക് ടോക്കണുകള്‍ ഏര്‍പ്പെടുത്തിയിരിക്കുകയാണ് ആര്‍ബിഐ. ഏകദേശം 35 കോടി കാര്‍ഡുകള്‍ ഇതുവരെ ടോക്കണൈസ് ചെയ്തതായി ആര്‍ബിഐ അറിയിച്ചു. ഇനിയും കാര്‍ഡ് ടോക്കണൈസ് ചെയ്യാത്തവര്‍ ഉണ്ടെങ്കില്‍ ഉടനെ പുതിയ നിയമത്തിന്റെ കീഴിലേക്ക് വരണം എന്ന് ആര്‍ബിഐ ഡെപ്യൂട്ടി ഗവര്‍ണര്‍ ടി റാബി ശങ്കര്‍ പറഞ്ഞു.

കാലതാമസം ഒഴിവാകും, പൂര്‍ണമായും ഡിജിറ്റല്‍ ആകാനൊരുങ്ങി റെയില്‍വേ... Read More

എന്താണ് കാര്‍ഡ് ടോക്കണൈസേഷന്‍?'

റിസര്‍വ് ബാങ്ക് ഓഫ് ഇന്ത്യയുടെ  നിര്‍ദേശപ്രകാരം, ഇടപാടുകളില്‍ കാര്‍ഡുകളടെ യഥാര്‍ത്ഥ വിവരങ്ങള്‍ പങ്കിടാതെ പകരം 'ടോക്കണ്‍' എന്ന് വിളിക്കുന്ന ഒരു ഇതര കോഡ് നല്‍കുന്നതിനെയാണ് കാര്‍ഡ് ടോക്കണൈസേഷന്‍ എന്നതുകൊണ്ട് അര്‍ത്ഥമാക്കുന്നത്. അതായത് ഇനി മുതല്‍ കാര്‍ഡ് നമ്പര്‍, കാലഹരണ തിയതി, സിവിവി എന്നിവ നല്‍കേണ്ട ആവശ്യം ഇല്ല. 

ടോക്കണൈസേഷന്റെ പ്രയോജനം എന്താണ്?

കാര്‍ഡ് ഇടപാടിന്റെ സമയത്ത് യഥാര്‍ത്ഥ കാര്‍ഡ് വിശദാംശങ്ങള്‍ വ്യാപാരിയുമായി പങ്കിടാത്തതിനാല്‍ ടോക്കണൈസ്ഡ് കാര്‍ഡ് ഇടപാട് സുരക്ഷിതമായി കണക്കാക്കപ്പെടുന്നു. അതായത് വെബ്‌സൈറ്റ് ഹാക്ക് ചെയ്യപ്പെട്ടാലും ഉപഭോക്താവിന്റെ കാര്‍ഡ് വിവരങ്ങള്‍ നഷ്ടമാകില്ല. 

2023 സാമ്പത്തിക വര്‍ഷത്തേക്കുള്ള പണപ്പെരുപ്പ പ്രവചനം മാറ്റമില്ലാതെ 6.7 ശതമാനമായി നിലനിര്‍ത്താന്‍ ആര്‍ബിഐ... Read More

ടോക്കണൈസേഷന്‍ എങ്ങനെ?

കാര്‍ഡ് ഉടമ ഓണ്‍ലൈനിലൂടെ സാധനങ്ങള്‍ വാങ്ങിയശേഷം, പണം നല്‍കാനായി ഡെബിറ്റ് കാര്‍ഡ്/ ക്രെഡിറ്റ് കാര്‍ഡ് വിവരങ്ങള്‍ നല്കാന്‍ ആവശ്യപ്പെടുമ്പോള്‍ നിങ്ങളുടെ കാര്‍ഡിന്റെ ബാങ്ക് ഏതാണോ അത് തെരഞ്ഞെടുക്കുക. തുടര്‍ന്ന്, 'secure your card as per RBI guidelines' or 'tokenise your card as per RBI guidelines' എന്നീ ഓപ്ഷനുകളില്‍ നിന്ന് ഏതെങ്കിലും ഒന്ന് തിരഞ്ഞെടുക്കുക. ശേഷം, ടോക്കണ്‍ ലഭിക്കാന്‍ അനുവാദം നല്‍കുക.