സംരംഭം തുടങ്ങാന്‍ ഇതാ സുവര്‍ണ്ണാവസരം 

ഒരു സംരംഭം തുടങ്ങി രക്ഷപെടണമെന്നാണ് ഭൂരിപക്ഷം പേരുടെയും ആഗ്രഹം. എന്നാല്‍ പലരെയും പിന്നോട്ട് വലിക്കുന്നത് മുതല്‍മുടകക്കിനുള്ള തുക ഇല്ലാത്തതാണ്. ഒരു പത്തു ലക്ഷം എങ്കിലും മുടക്കാതെ ഇന്നത്തെ കാലത്ത് എന്ത് ബിസിനസാണ് തുടങ്ങാന്‍ സാധിക്കുക. പക്ഷെ അതിനുള്ള തുക എവിടുന്നു കണ്ടെത്തും? അങ്ങനെയുള്ളവരെ സഹായിക്കാന്‍ കേരള സര്‍ക്കാര്‍ പുതിയ പദ്ധതികള്‍ ആവിഷ്‌ക്കരിച്ചു കഴിഞ്ഞു. 2 ലക്ഷം രൂപ മുടക്കാന്‍ തയ്യാറെങ്കില്‍ 8 ലക്ഷം രൂപ ലോണിന്റെയും ഗ്രാന്റിന്റെയും രൂപത്തില്‍ സര്‍ക്കാര്‍ ലഭ്യമാക്കും.  
 

ചെറുകിട സംരംഭങ്ങള്‍ക്കായുള്ള ഗ്രാന്റ് സര്‍ക്കാര്‍ പുതുക്കി.ഗ്രാന്റില്‍ ഭക്ഷ്യസംസ്‌കരണ സംരംഭങ്ങള്‍, മറ്റു നിര്‍മാണ യൂണിറ്റുകള്‍, ജോബ് വര്‍ക്കുകള്‍ ചെയ്യുന്ന സ്ഥാപനങ്ങള്‍ എന്നിവയെ മാത്രമായിരുന്നു മുന്‍പ് ഉള്‍ക്കൊള്ളിച്ചിരുന്നത്. ഇതാണ് ഇപ്പോള്‍ സേവന സ്ഥാപനങ്ങളെയും അര്‍ഹതപ്പട്ടികയില്‍ ഉള്‍പ്പെടുത്തി പുതുക്കിയത്.

മെയ് 21നാണ് നാനോ സംരംഭകരെ സംരക്ഷിക്കുന്ന വിവിധ തീരുമാനങ്ങള്‍ സര്‍ക്കാര്‍ നടപ്പിലാക്കി തുടങ്ങിയത്. 10 ലക്ഷം രൂപയില്‍ താഴെ പദ്ധതിച്ചെലവു വരുന്ന സംരംഭങ്ങള്‍ക്ക് 40% (പരമാവധി 4 ലക്ഷം) വരെ ഗ്രാന്റ് നല്‍കുന്നതാണ് പദ്ധതി. 40 വയസ്സില്‍ താഴെയുള്ളവര്‍, സ്ത്രീകള്‍, പിന്നോക്ക വിഭാഗക്കാര്‍, അംഗപരിമിതര്‍, വിമുക്തഭടന്മാര്‍ എന്നിങ്ങനെയാണ് നാല്‍പ്പത് ശതമാനം ഗ്രാന്റ് ലഭിക്കുക. അല്ലാത്തവര്‍ക്ക് 30%ആണ് മാര്‍ജിന്‍ മണി ഗ്രാന്റ് (3 ലക്ഷം രൂപ വരെ).

ഈ പുതിയ നയം പ്രകാരം 40 ശതമാനം ഗ്രാന്റ് ലഭിക്കുന്നവര്‍ക്ക് പദ്ധതിച്ചെലവിന്റെ ഭാഗമായി ഗ്രാന്റ് 10 ലക്ഷം രൂപ ചെലവു വരുന്ന സംരംഭം പുതുതായി തുടങ്ങാന്‍ 4 ലക്ഷം രൂപ ബാങ്ക് വായ്പയും 4 ലക്ഷം രൂപ സര്‍ക്കാര്‍ ഗ്രാന്റും 2 ലക്ഷം രൂപ സംരംഭകന്റെ വിഹിതവും എന്ന നിലയില്‍ പദ്ധതി പൂര്‍ത്തിയാക്കാന്‍ കഴിയും. അതായത് പത്ത് ലക്ഷം രൂപയുടെ പദ്ധതിയില്‍ രണ്ട് ലക്ഷം രൂപ മാത്രം സംരംഭകന്‍ കണ്ടെത്തിയാല്‍ മതിയാകും  ബാക്കി പണം ഗ്രാന്റും വായ്പയായും ലഭിക്കുമെന്നര്‍ത്ഥം.

 നിലവിലെ സംരംഭങ്ങള്‍ക്ക് ഗ്രാന്റ് ലഭിക്കില്ല.പുതിയ സംരംഭങ്ങള്‍ ആരംഭിക്കാനേ പദ്ധതി പ്രകാരം ഗ്രാന്റ് അനുവദിക്കൂ. ബാങ്ക് വായ്പ എടുക്കുന്നവര്‍ക്കാണ് ഗ്രാന്റ് ലഭിക്കുക. ഏതെങ്കിലും വിധത്തില്‍ മൂല്യവര്‍ധന വരുത്തുന്ന സേവന സ്ഥാപനങ്ങള്‍ക്ക് അപേക്ഷിക്കാം. ഈ പദ്ധതി പ്രകാരം മാര്‍ജിന്‍ മണി ഗ്രാന്റിന് അര്‍ഹതയുള്ള ഏതാനും സംരംഭങ്ങളുടെ ലിസ്റ്റും സര്‍ക്കാര്‍ പുറത്തുവിട്ടിട്ടുണ്ട്.സ്ഥാപനങ്ങളുടെ അര്‍ഹത ജില്ലാ വ്യവസായ കേന്ദ്രം ജനറല്‍ മാനേജര്‍ ആണ് നിശ്ചയിക്കുക.

അപേക്ഷയ്ക്ക് പ്രത്യേക ഫോര്‍മാറ്റ് ഇല്ല. പ്രോജക്റ്റ് റിപ്പോര്‍ട്ടുമായി തിരിച്ചറിയല്‍ രേഖകള്‍, ക്വട്ടേഷന്‍ എന്നിവ സഹിതം താലൂക്ക് വ്യവസായ ഓഫിസിലാണ് അപേക്ഷ സമര്‍പ്പിക്കേണ്ടത്. അസിസ്റ്റന്റ് ജില്ലാ വ്യവസായ ഓഫിസറാണ് ധനകാര്യ സ്ഥാപനങ്ങളിലേക്ക് വായ്പ ശുപാര്‍ശ ചെയ്യുന്നത്. വായ്പ അനുവദിക്കുന്ന മുറയ്ക്ക് സര്‍ക്കാര്‍ ഗ്രാന്റ് ലഭ്യമാക്കുന്നു. കൂടുതല്‍ വിവരങ്ങള്‍ക്ക് www.industries.kerala.gov.in എന്ന വെബ്‌സൈറ്റ് പരിശോധിക്കുക.