വീണ്ടുവിചാരമില്ലായ്മ, ക്ഷമയില്ലായ്മ, നിയന്ത്രണമില്ലായ്മ, ആരെയും പേടിക്കാതിരിക്കുക ഇതെല്ലാം കുട്ടികളിലെ എഡിഎച്ച്ഡി (ഹൈപ്പർ ആക്റ്റിവ്) അവസ്ഥയുടെ ലക്ഷണങ്ങളാണ്. ഇത്തരക്കാർക്ക് അപകട സൂചന നൽകാനുള്ള തലച്ചോറിന്റെ കഴിവ് വളരെ കുറവാണ്. എടുത്തുചാടി ഓരോ കാര്യങ്ങളിൽ പ്രവർത്തിക്കും. ആ സമയങ്ങളിൽ കുട്ടിക്ക് പേടിയോ മറ്റു ചിന്തകളോ ഒന്നും ഉണ്ടാവില്ല. സിവിയർ ഹൈപ്പർ ആക്റ്റിവ് ആയ കുട്ടികളാണ് ഇങ്ങനെ. അനുഭവങ്ങളിൽ നിന്നും അവർ പാഠം പഠിക്കില്ല. മാതാപിതാക്കളും മറ്റ് മുതിർന്നവരും വിചാരിച്ചാൽ ഒരു പരിധിവരെ കുട്ടികളിലെ ഇത്തരം ഹൈപ്പർ ആക്റ്റിവിറ്റി നിയന്ത്രിക്കാവുന്നതേയുള്ളൂ. ഹൈപ്പർ ആക്ടിവിറ്റിയുള്ള കുട്ടികൾക്ക് പഠന വൈകല്യം ഉണ്ടാകാം. ചില കുട്ടികൾക്ക് മാനസിക സമ്മർദ്ദവും ഉണ്ടാകാറുണ്ട്. പെട്ടെന്ന് ദേഷ്യം വരിക, പുകവലിയുടെ ഉപയോഗം, മയക്കു മരുന്ന് ഉപയോഗിക്കുക ഇത്തരത്തിലുള്ള ദുശീലങ്ങളും ചില കുട്ടികളിൽ ഉണ്ടാകാറുണ്ട്. അവരെ ഒരു കാരണവശാലും ഒറ്റപ്പെടുത്തരുത്. ചെറിയകാര്യങ്ങൾക്കു പോലും അഭിനന്ദിക്കുകയാണ് വേണ്ടത്. അവനിലെ വ്യക്തിയെ അംഗീകരിക്കുകയാണ് ചെയ്യേണ്ടത്. ചെറിയ ഏകാഗ്രതക്കുറവും ഉയർന്ന നിലയിലുള്ള ചുറുചുറുക്കും കുട്ടികളിൽ സാധാരണയാണ്. എന്നാൽ എഡിഎച്ച്ഡി കുട്ടികളിൽ ഇവയുടെ അളവ് സാധാരണയിലും അധികമായിരിക്കും. അവരുടെ പ്രവൃത്തികൾ സ്കൂളിലും വീട്ടിലും കളിസ്ഥലത്തും മറ്റും പ്രശ്നങ്ങൾ ഉണ്ടാക്കുന്ന തരത്തിലായിരിക്കും. അതവരുെട സൗഹൃദങ്ങളെപ്പോലും ബാധിക്കും. എന്നാൽ സ്കൂളിൽ പ്രശ്നക്കാരും വീട്ടിൽ നല്ല കുട്ടികളുമാണെങ്കിൽ അത് എഡിഎച്ച്ഡി ആവണമെന്നില്ല, അതുപോലെതന്നെ തിരിച്ചും.

കുട്ടികളുടെ പഠനനിലവാരം മെച്ചപ്പെടുത്താനുള്ള എളുപ്പവഴികൾ... Read More

എഡിഎച്ച്ഡി ഉണ്ടാകാനുള്ള കാരണങ്ങൾ

• എഡിഎച്ച്ഡി യുെട പ്രധാന കാരണം ജീനിന്റെ പ്രവർത്തനമാണെന്ന് പഠനങ്ങൾ പറയുന്നു.
• പരിസ്ഥിതിയിലെ ഈയത്തിന്റെ (lead) അളവ് കൂടുന്നത് കുട്ടികളിൽ ഹൈപ്പർ ആക്ടിവിറ്റി കൂടാൻ കാരണമാകുന്നു.
• തലച്ചോറിന്റെ വികാസത്തിലെ തകരാറുകൾ.
• ഗർഭാവസ്ഥയിൽ അമ്മ ഉപയോഗിച്ച ചില മരുന്നുകൾ, മദ്യപാനം, പുകവലി തുടങ്ങിയവ.
• മാസം തികയാതെ ജനിക്കുന്ന കുട്ടികളിൽ ഈ അവസ്ഥ കണ്ടുവരുന്നു.

ചില ലക്ഷണങ്ങൾ താഴെപ്പറയുന്നു

• ഒരുതരത്തിലും അടങ്ങിയിരിക്കാൻ ഇവർക്കാകില്ല. ഏത് സമയത്തും ഞെളിപിരികൊള്ളുക എന്നത് ഇവരുെട ലക്ഷണമാണ്.
• നിർബന്ധമായും ഒരിടത്ത് ഇരിക്കേണ്ട അവസ്ഥയിൽപ്പോലും അടങ്ങിയിരിക്കാൻ പറ്റാതെ വരിക.
• സാഹചര്യം പോലും നോക്കാതെ ഓടി നടക്കുക, അവിടെയും ഇവിടെയും വലിഞ്ഞു കയറുക, മുതിർന്നവർ പറഞ്ഞാലും അനുസരിക്കാതിരിക്കുക.
• മറ്റു കുട്ടികൾക്കൊപ്പം കളികളിലും മറ്റും പങ്കടുക്കുമ്പോൾ വഴക്കുണ്ടാക്കുക.
• അനാവശ്യമായ സംസാരം.
• ചോദ്യം ചോദിച്ചു തീരും മുൻപേ ഉത്തരം പറയാനുള്ള വ്യഗ്രത.
• തന്റെ ഊഴം എത്തുന്നതുവരെ കാത്തിരിക്കാൻ ഇത്തരക്കാർക്കാവില്ല.
• മറ്റുള്ളവർ സംസാരിക്കുമ്പോഴും കഴിക്കുമ്പോഴും ഇടയിൽ കയറുക.
• മറ്റ് കുട്ടികളെപ്പാേലെ കാര്യങ്ങൾ പെട്ടെന്നും ശരിയായും ഗ്രഹിക്കാൻ പ്രയാസമായിരിക്കും.