ബ്ലൂംബെര്‍ഗ് ഇന്റക്‌സിലെ 2021 നവംബര്‍ 27 ലെ കണക്ക് പ്രകാരമാണിത്

റിലയന്‍സ് ഇന്റസ്ട്രീസ് ചെയര്‍മാനും മാനേജിങ് ഡയറക്ടറുമായ മുകേഷ് അംബാനി വീണ്ടും ഏഷ്യയിലെ അതിസമ്പന്നരില്‍ ഒന്നാമനായി. കഴിഞ്ഞ ഓഹരി വിപണിയിലുണ്ടായ ഇടിവിനെ തുടര്‍ന്നാണിത്. ഗൗതം അദാനിയും മുകേഷ് അംബാനിയും തമ്മില്‍ ആസ്തിയിലെ അന്തരം ഇതോടെ 13 ബില്യണ്‍ ഡോളറായി വര്‍ധിച്ചു.

91.4 ബില്യണ്‍ ഡോളറാണ് അംബാനിയുടെ ആസ്തി. ലോകത്തെ അതിസമ്പന്നരില്‍ ഇപ്പോള്‍ 11ാമതാണ് അദ്ദേഹം. ഗൗതം അദാനിയാകട്ടെ 13ാം സ്ഥാനത്താണ്. ഇദ്ദേഹത്തിന്റെ ആസ്തി 78.1 ബില്യണ്‍ ഡോളറാണ്. ബ്ലൂംബെര്‍ഗ് ഇന്റക്‌സിലെ 2021 നവംബര്‍ 27 ലെ കണക്ക് പ്രകാരമാണിത്.

ഓഹരി വിപണിയിലുണ്ടാകുന്ന ചാഞ്ചാട്ടങ്ങള്‍ അതിസമ്പന്നരുടെ ആസ്തികളില്‍ നേരിട്ട് പ്രതിഫലിക്കുന്നതിനാല്‍ ഈ സ്ഥാനങ്ങള്‍ ഇനിയും മാറിമറിഞ്ഞേക്കും. അവരവര്‍ക്ക് ഉടമസ്ഥാവകാശമുള്ള ഓഹരികളുടെ മൂല്യത്തിലുണ്ടാകുന്ന ഇടിവും വര്‍ധനവും അംബാനിയുടെയും അദാനിയുടെയും ആസ്തികളില്‍ വലിയ ചലനങ്ങളാണ് സൃഷ്ടിക്കാറുള്ളത്.

ബാഹ്യ നിക്ഷേപങ്ങളില്ലാതെയും സ്റ്റാര്‍ട്ടപ്പ് ആരംഭിക്കാം...അറിയാം ബൂട്ട്സ്ട്രാപ്പ് സ്റ്റാര്‍ട്ടപ്പുകളെ കുറിച്ച്... Read More

അദാനി ഗ്രൂപ്പിന്റെ കമ്പനികളേക്കാള്‍ മൂന്ന് മടങ്ങ് വലിപ്പമുണ്ട് റിലയന്‍സ് ഇന്റസ്ട്രീസ് ഗ്രൂപ്പിന്. എന്നാല്‍ കഴിഞ്ഞ വര്‍ഷം അദാനി എന്റര്‍പ്രൈസസ്, അദാനി പവര്‍, അദാനി പോര്‍ട്‌സ്, അദാനി സ്‌പെഷല്‍ ഇക്കണോമിക് സോണുകളെല്ലാം പതിന്മടങ്ങ് വളര്‍ച്ചയാണ് കാഴ്ചവെച്ചത്. 

ഇന്ത്യയില്‍ അതിസമ്പന്നരുടെ നിരയില്‍ ഒരു പതിറ്റാണ്ടോളമായി അതികായനാണ് മുകേഷ് അംബാനി. എന്നാല്‍ ഗൗതം അദാനിയാകട്ടെ ആദ്യ പത്ത് അതിസമ്പന്നരില്‍ തന്നെ അടുത്ത കാലത്തായി രംഗപ്രവേശം ചെയ്തയാളുമാണ്. എന്നാല്‍ ഇരുകമ്പനികളും ഊര്‍ജ്ജ വിതരണമടക്കമുള്ള മേഖലകളില്‍ നേരിട്ട് കൊമ്പുകോര്‍ക്കാന്‍ തീരുമാനിച്ചതോടെ ഇനി അതിസമ്പന്നരുടെ നിരയില്‍ ആരാണ് സിംഹാസനമുറപ്പിക്കുകയെന്ന് കണ്ടുതന്നെ അറിയണം.